广东赣粤派崔氏係喺北宋年间迁入广东嘅，但如果要追溯上去嘅话，赣粤派最初係喺唐朝由中原南迁到江西先噶。唐朝距今成千年，甘究竟係边位太公长途跋涉，由河南搬到江西定居噶呢？呢位太公就叫质公。
南方甘荒凉，点解要黎江西定居啊？
如果我地睇翻赣粤派崔氏最早嘅谱序，就可以搵到啲蛛丝马迹啦。宋朝绍熙甲寅年（1194年）第十三世弘之公写过一篇名为“历代宗图事迹”嘅文章（新会谱个题目写“历代宗图事迹”，增城谱、三山谱、员岗谱就叫“江西宁都谱序”），入面係甘样写嘅：“後有震翁自大梁遷任於虔州刺史，年高位極，致仕虔州，住於此州。已經數代，城廓雖樂，不及鄉居，嘗談虔化綠水青山，神山聖蹟之地，但聞其名，未住其所。父子相謂曰：心堅石穿。遂登山涉水，行至一處地名曰白鹿營。觀玩此處，山廻水抱，地土肥膄。前有瑞金之應，後有秀嶺之名，左有雲石之朝，右有螺峰之應，就此開營住址，以為養應之地。稅產眾多，人丁旺盛，蓋有始祖三娶，遂生六子。頭妻二子，長男十六郎，名質，次男十七郎，名彬。”
由此可见，其实唔係崔质最先到宁都嘅，而係佢老窦崔震。崔震任虔州刺史（地方官），因为年龄比较大，所以任满之后就冇翻中原老家啦，带住三个老婆六个仔留係宁都。佢地最初都系住喺县城嘅，后来听闻“虔化”呢个地方，前后左右都有山，山清水秀，又係个风水宝地，所以佢地几仔爷就登山涉水，搵到三条大江汇合之处嘅“白鹿营”定居啦（係当今宁都县嘅阳都村）。据说，依家阳都村嘅“崔氏家庙”个位置，就系当年佢地搭茅寮嘅地方啊！
注：由于崔氏后期分布比较广，各个地方嘅族谱又唔全，所以做下做下就写成係质公做虔州刺史，但其实係质公个阿爸震公做虔州刺史搬黎宁都，质公本人个官位係侍郎。所以唔好再搞错啦！
质公係咩年代嘅人呢？
关于质公係咩年代嘅人，其实有两种讲法，一种係唐穆宗年代（795-824年），另一种係五代十国嘅后唐庄宗年代（885-926年）。两个时间相差成百年，甘边个先係啱噶呢？我地可以从几方面去考证一下。
一、 最早嘅族谱係点写噶呢？
上面提过嘅宋朝绍熙甲寅年（1194年）嘅谱序冇写质公係咩年代，但係之后嘅大元至正十七年（1357年）第十七世绍宗公写嘅“崔氏家谱相继”有写，入面甘讲嘅：“孫恩追祖，考自唐穆宗朝任侍郎諱質，往虔化下鄉白鹿營，徙寧都寨太平鄉永清里廖家坑，為始世祖焉。”
之后係大明嘉靖十九年（1540年）爌公係增城谱嘅“序”入面写道：
“但夫流既遠，世難具悉，故舊譜謂中更唐末奔波相尋，家牒脫落，自汴梁而溯沛州，世數未詳，虔化而下始有可紀。此四世祖延俊之譜例圖序載於江右譜，時可考斷自唐穆宗朝任侍郎諱質者為第一世始遷之宗。”
所以两篇最早嘅谱序都係写唐穆宗年代。
甘边度写质公係五代十国后唐庄公年代嘅人呢？后期嘅宁都谱、沙头谱同员岗谱就有甘嘅讲法啦。員岡房十九世孫弼公係清道光年（1846年）帮沙头写谱序嘅时候就话：“余員岡房與南海沙頭房俱出博陵，為唐莊宗侍郎質公之後，由汴梁徙居虔化，即今江西甯都州也。”
但係又奇怪喔，员岗自己本族谱1616年嘅“崔氏族谱源流考”又唔係甘写。员岗十三世孫兆岳公、應房公、啟祚公、愈昭公等写嘅“崔氏族谱源流考”写嘅係：
“至肅代宗朝任虔州刺史者，生長男十六郎，諱質者，於德宗朝興元登仕，穆宗長慶年間任兵部左侍郎也。自汴遷贛之虔化，即今之寧都縣也。”
可见，后唐庄宗嘅年代係后来先出现嘅，最初都系记载唐穆宗年代。
二、质公嘅子孙係咩年代嘅人呢？
如果睇沙头谱明朝万历年嘅“题崔门纂撰修家乘世牒序”，就可以睇到：
“爰溯厥所由，則唐侍郎諱質者始祖也。質生爽。爽生長史二十朗。朗生唐文宗太和進士、任容都敕誥神武右軍、池州團練、討擊使，守鎮江十八州延俊。”
如果质公个曾孙延俊公係唐文宗年代嘅人，甘佢嘅太公质公又掂会係五代十国时候嘅人呢？（唐文宗比后唐庄宗早）再加上增城谱入面，第四世延范公个度写住：“五代史载表一道”，甘又证明第四世先係唐末到五代十国嘅时候，质公係比呢个时间早。
三、当时宁都嘅行政规划係点噶？
江西南部係唐朝嘅时候属虔州，领七县（赣县、于都县、南康县、宁都县（虔化）、南安县（信丰）、大余县、安远县）。唐朝灭亡后，喺五代十国嘅后梁开平三年（公元909年）虔州归属后梁，之后虔州一度并入吴国版图，又并入南唐版图。宁都喺五代十国都唔係属于后唐国，甘质公又边有可能住係后梁国或者吴国，又做后唐国嘅官呢？佢老窦震公係中原人，又点会派到另外一个国家做官呢？所以可以肯定震公、质公都唔係五代十国时代嘅人，而係唐朝嘅人。
四、再睇黄金坑祖坟嘅年代
根据族谱记载，宁都黄金坑嘅祖坟係有段古噶。唐僖宗嘅国师杨筠松因为黄巢起义（公元880年）南逃宁都，係呢度见到崔氏嘅祖坟，同崔氏讲个祖坟个位定得唔好，仲指点崔氏点样可以得到“真穴”（呢个又係另一段古仔啦~）。所以如果唐僖宗嘅时候已经有崔氏祖坟，甘质公就肯定係唐僖宗前嘅人，冇可能係五代十国嘅人啦！
广东更荒凉，仲係南蛮地，点解又要黎呢度定居啊？
质公嘅子孙一直喺江西宁都发展，从第五代开始就陆续有崔氏先祖被派往广东当官，大部分都喺任期满咗就翻宁都住，直到第十世克公，又即係赣粤派嘅始迁祖。据传说，克公喺江西娶咗正室廖氏，但係冇仔生，后来被派到广东肇庆当后补（芝麻绿豆嘅官职），跟住喺当地娶咗个庶室朱氏。朱氏生咗两个仔，大仔叫隽公（粤语读音：俊），二仔叫奭公（粤语读音：色）。克公任满后带廖氏翻宁都安享晚年，唔知点解朱氏冇走，带住两个仔留喺肇庆。就係甘样，崔氏正式定居喺广东，唔再翻江西啦！
❊文内出现的商标、标识及图像版权属于其合法持有人，只供传递信息之用，非商务用途。如无意侵犯到您的权益，请及时联系我们处理。
